Inuusuttunut ilinniarfinni naammassinnittarnerit
Saqqummersitami uani ilinniartut ilinniakkamik aallartitsinermiit ukiut 1-10 qaangiunnerini ilinniarnermi killiffii saqqummersinneqartarput. Ilinniartut ilinniakkaminnik naammassinnissimasut ilinniakkap aallartinneraniit ukiut quliut tungaannut qaangiunnerini agguaqatigiissillugu naammassisarnermut pct.-iat tabelinit naatsorsorneqarsinnaavoq.
Tabelini ilinniarnermi killiffiit naatsorsukkat tassaapput:
• Ilinniakkami pineqartumi aallartinneqarsimasumi killiffik
• Ilinniakkap qaffasissusaani aallartinneqarsimasumi killiffik
Tabelimi kingullermi ilinniartut ilinniakkap qaffasissusaani ataatsimi ilinniakkap sammivianik allanngortitsisut sillimaffigineqarput.
Saqqummersitami inuusuttunut ilinniarfinni ilinniakkat kisimik pineqarput. Ingerlariaqqiffiusumik ilinniarfinni naammassinnittarnerit pillugit saqqummersitaq stat.gl –imi takuneqarsinnaavoq.
Ilinniakkamik aallartissimasamik naammassinnittarneq
Ilinniarnertuunngorniarfik ukiunik pingasunik sivisussusilerneqarsimasumik ilinniarnertuunngorniarnermik (GUX), GUX-imik atuarnerit ukiut marluk pisartut soorlu eGUX aammalu inersimasunut ilinnialernissamut piareersarluni pikkorissarnermik, 2016 sioqqullugu ukiumik ataatsimik sivisussusilerneqarsimasumik, imaqarpoq. Sanilliussisinnaanissaq peqqutigalugu ilinniarnertuunngorniarnerit ukiunik pingasunik sivisussusillit kisitsisini paasissutissani kisimik ilanngunneqarput.
2019-imi ilinniarnertuunngorniarlutik aallartissimasut 42 pct.-ii ukiut pingasut qaangiunnerini ilinniakkamik naammassinnissimapput. Ukiut tallimat qaangiunnerini naammassinnissimasut 56 pct.-imut qaffassimapput.
Inuussutissarsiornermik ilinniarfinni ilinniakkat sivisussusaat siammasipput, taamaattumik kisitsisini paasissutissani inuussutissarsiornermik ilinniakkanut naatsunut ukiup affaaniit ukiunik marlunnik sivisussuseqartunut aammalu inussutissarsiornermik ilinniakkanut nalinginnaasunut minnerpaamik ukiunik marlunnik sivisussuseqartunut immikkoortiterneqarput. 2020-mi inuussutissarsiornermik ilinniarfinni naatsuni aallartissimasut 66 pct.-ii ukiut marluk ingerlanerini ilinniakkatik naammassisimavaat. Ukiullu marluk qaangiunnerini 69 pct.-iisa ilinniakkatik naammassisimallugit.
Inuussutissarsiornermik ilinniakkani nalinginnaasuni naammassinnittarnermut pct.-i appasinneruvoq. Ukiut sisamat ingerlanerini 34 pct.-ii ilinniakkaminnik 2018-imi aallartissimasaminnik naammassinnissimapput. Ukiut arfinillit qaangiunnerini 40 pct.-ii ilinniakkaminnik naammassinnissimapput.
Titartagaq 1. Inuusuttunut ilinniarfinni ukiunik marlunnik sivisunerusumillu sivisussuseqartuni naammassinnittarnermut pct.-i, 2018-imi, 2019-imi 2020-milu aallartittut malillugit
Nalunaarut: Ilinniarnertuunngorniarfinni ilinniagaq ukiunik pingasunik sivisussusilik kisimi pineqarpoq. Naammassinnittarnermut pct.-i ukiup pineqartup naanerani naatsorsorneqarpoq, ukiorlu siullermeerluni ilinniakkamik aallartitsivik ungaluuserlugu ilanngunneqarpoq: Ilinniarnertuunngorniarneq (2019), inuussutissarsiornermik ilinniakkat naatsut (2020), inuussutissarsiornermik ilinniakkat nalinginnaasut (2018). Ilinniakkat sivisussusaat ukioq kaajallallugu naatsorsorneqarput ilinniarnertuunngorniarnermullu ukiut pingasuullutik, inuussutissarsiornermik ilinniakkanut naatsunut ukiut marluk aammalu inuussutissarsiornermik ilinniakkanut nalinginnaasunut ukiut sisamat. Najoqqutaq: Naatsorsueqqissaartarfik – kisitsisaataasivimmi kisitsisit takukkit (https://bank.stat.gl/UDNISC11L).
Arnat angutillu akornanni naammassinnittartut
Ilinniarnertuunngorniarfinni aamma inuussutissarsiornermik ilinniarfinni naatsuni ilinniarfinni aallartittartut arnat amerlanerusarput, angutit inuussutissarsiornermik ilinniarfinni sivisuuni aallartittartut amerlanerusartut. Angutit arnallu aallartinneranniit ukiut marluk sinnerlugilluunniit qaangiunneranni, ilinniarnissamut piffissarititaasoq malillugu, naammassisimasut arnat amerlanerulaarput.
Arnat 2019-imi ilinniarlutik aallartissimasut 57 pct.-ii ilinniarnertuunngorsimapput angutit 54 pct.-ii ilinniarnertuunngorsimasut. Inuussutissarsiornermik ilinniarfinni naatsuni arnat 2020-mi aallartissimasut 68 pct.-ii angutillu 70 pct.-ii naammassinnissimapput. 2018-imi nalinginnaasumik inuussutissarsiummik ilinniarlutik aallartissimasut arnat 38 pct.-ii aamma angutit 41 pct.-ii naammassinnissimapput.
Titartagaq 2. Inuusuttunut ilinniarfinni ukiunik marlunnik sivisunerusumillu sivisussuseqartuni naammassinnittarnermut pct.-i, 2018-imi, 2019-imi 2020-milu aallartittut suiaassusaat malillugu
Nalunaarut: Ilinniarnertuunngorniarfinni ilinniagaq ukiunik pingasunik sivisussusilik kisimi pineqarpoq. Naammassinnittarnermut pct.-i ukiup pineqartup naanerani naatsorsorneqarpoq, ukiorlu siullermeerluni ilinniakkamik aallartitsivik ungaluuserlugu ilanngunneqarpoq: Ilinniarnertuunngorniarneq (2019), inuussutissarsiornermik ilinniakkat naatsut (2020), inuussutissarsiornermik ilinniakkat nalinginnaasut (2018). Ilinniakkat sivisussusaat ukioq kaajallallugu naatsorsorneqarput ilinniarnertuunngorniarnermullu ukiut pingasuullutik, inuussutissarsiornermik ilinniakkanut naatsunut ukiut marluk aammalu inuussutissarsiornermik ilinniakkanut nalinginnaasunut ukiut sisamat. Najoqqutaq: Naatsorsueqqissaartarfik – kisitsisaataasivimmi kisitsisit takukkit (https://bank.stat.gl/UDNISC11M).
Nuna ilinniarfik malillugu naammassinnittarneq
Kalaallit Nunaanni 2019-imi ilinniarnertuunngorniarlutik aallartittut 54 pct.-ii ukiut tallimat ingerlanerini naammassipput. Ukioq taanna Kalaallit Nunaata avataani ilinniarnertuunngorniarlutik aallartittut 84 pct.-ii ukiut tallimat ingerlanerini naammassisimasut. Kalaallit Nunaannit ilinniagaqarnersiuteqartut amerlanersaat Kalaallit Nunaanni ilinniartuusarput. 2019-imi 376-it ilinniarnertuunngorniarlutik allartissimapput, Kalaallit Nunaata avataani 31-t ilinniarnertuunngorniarlutik allartissimasut.
Inuussutissarsiornermik ilinniarfinni naatsuni nalinginnaasunilu Kalaallit Nunaanni ilinniartut Kalaallit Nunaata avataani ilinniartuniit amerlanerusut ilinniakkaminnik naammassinnissimapput. 2020/2018-imi Kalaallit Nunaanni ilinniartut 70 pct.-ii aammalu 41 pct.-ii inuussutissarsiornermik ilinniakkamik ukiunik marlunnik sivisunerusumillu sivisussuseqartumik naammassinnissimapput. Kalaallit Nunaata avataani ilinniartut 44 pct.-ii aammalu 34 pct.-ii naammassinnissimapput.
Titartagaq 3. Inuusuttunut ilinniarfinni ukiunik marlunnik sivisunerusumillu sivisussuseqartuni naammassinnittarnermut pct.-i, 2018-imi, 2019-imi 2020-milu aallartittut nuna ilinniarfiat malillugu
Nalunaarut: Ilinniarnertuunngorniarfinni ilinniagaq ukiunik pingasunik sivisussusilik kisimi pineqarpoq. Naammassinnittarnermut pct.-i ukiup pineqartup naanerani naatsorsorneqarpoq, ukiorlu siullermeerluni ilinniakkamik aallartitsivik ungaluuserlugu ilanngunneqarpoq: Ilinniarnertuunngorniarneq (2019), inuussutissarsiornermik ilinniakkat naatsut (2020), inuussutissarsiornermik ilinniakkat nalinginnaasut (2018). Ilinniakkat sivisussusaat ukioq kaajallallugu naatsorsorneqarput ilinniarnertuunngorniarnermullu ukiut pingasuullutik, inuussutissarsiornermik ilinniakkanut naatsunut ukiut marluk aammalu inuussutissarsiornermik ilinniakkanut nalinginnaasunut ukiut sisamat. Najoqqutaq: Naatsorsueqqissaartarfik – kisitsisaataasivimmi kisitsisit takukkit (https://bank.stat.gl/UDNISC11L).
Ilinniakkap qaffasissusaanik aallartissimasamik naammassinnittarneq
Ilinniartut ilaat ilinniagaq aallartitartik unitsittarpaat inuusuttunullu ilinniarfimmut allamut ingerlaqqiinnartarlutik. 2017-imi siullermeerlutik inuusuttunut ilinniarfimmik aallartitsisimasut 58 pct.-ii ukiut arfineq-marluk iluanni inuusuttunut ilinniarfimmik naammassinnissimapput. Taakkunannga ilinniarnertuunngorniarlutik aallartissimasut 55 pct.-ii ilinniarnertuunngorsimapput 8 pct.-illi inuussutissarsiornermik ilinniarfimmik naammassiinnarsimallutik. Inuussutissarsiornermik ilinniarfinni aallartissimasortaasa 49 pct.-ii inuussutissarsiornermik ilinniakkamik naammassinnissimapput, 2 pct.-illu ilinniarnertuunnguinnarsimallutik.
Titartagaq 4. Inuusuttunut ilinniarfimmi aallartinnermiit ukiut arfineq-marluk qaangiunnerini ilinniakkap killiffia, 2017-imi aallartittut malillugit
Inuusuttunut ilinniarfinni ilinniakkap qaffasissusaanik allamik naammassinnissimasut. Nalunaarut: Ilinniakkap killiffia ukiup naanerani ilinniartunut 2017-imi inuusuttunut ilinniarfimmik siullermeerlutik aallartitsisimasunut naatsorsorneqarpoq. Najoqqutaq: Naatsorsueqqissaartarfik – kisitsisaataasivimmi kisitsisit takukkit (https://bank.stat.gl/UDNISC11N).